Смағұл Үмбетбаев(Сматай Үмбетбаев). 1947 жылы Қарағанды облысы Жаңаарқа ауданында дүниеге келген.14-15 жасында қобыз тартып, концерттерге қатысады. 1971 жылы Алматыда өткен Жамбыл Жабаевтың 125 жылдық тойында көпшілікті табиғи талантымен қайран қалдырып, оны консерваторияға оқуға шақырады. Қобыз сыныбына емтихансыз қабылдайды. Белгілі қобызшы, дәулескер күйші Дәулет Мықтыбаевтан дәріс алып, танымалдығы арта түседі. Ол кісінің бойындағы хас талантты Еркеғали Рахмадиев ағамыз да ерекше қадірлеп, жатақханада тұра алмаған даланың қазағына студент кезінде жеке үй алып береді. Кейін бірқатар шет мемлекеттерде гастрольде болып, өнер көрсетеді. Әсіресе, Азия елдерін аралап, Үндістан, Қытай, Жапонияда болған концерттерден табыспен оралады. Тіпті жапондық көрермендер риза болғаны соншалық, «Тойота» жеңіл көлігін мінгізіп жібереді. Қобыз күйлерін тартумен қатар, өз жанынан да күйлер шығарған. Оның «Әкеге арнау», «1-май», «Жайнаған» сияқты күйлері бар.
