حالىق اسپاپتار وركەسترى، قۇرمانعازى اتىنداعى قازاقتىڭ مەملەكەتتىك اكادەميالىق حالىق اسپاپتار وركەسترى – ساحنالىق-كونسەرتتىك ۇجىم.
1944 جىلى قۇرمانعازى ەسىمى بەرىلدى، قازكسر-ىنىڭ ەڭبەك سىڭىرگەن ۇجىمى (1967)، 1978 جىلدان اكادەميالىق مارتەبەسى بەرىلدى. 1933 جىلى الماتىداعى مۋزىكالىق دراما تەحنيكۋمى (قازىرگى الماتى مۋزىكالىق كوللەدجى) جانىنان دومبىرا ءانسامبلى رەتىندە ا.ق. جۇبانوۆ ۇيىمداستىردى. ونىڭ قۇرامىندا 11 ادام بولدى، ال مۋزىكالىق اسپاپتارىنان تەك الت-دومبىرالار پايدالانىلىپ، حالىق كۇيلەرى مەن اندەرى ورىندالدى. 1934 جىلى انسامبل حالىق ونەرپازدارىنىڭ بۇكىلوداقتىق 1-سلەتىنە قاتىسىپ، حالىقتىڭ “كەڭەس”، “ايجان قىز”، “قاراباس”، ت.ب. كۇيلەرى مەن “بالقۋراي”، “قارعاش”، ت.ب. اندەرىن ورىندادى. سلەتتەن كەيىن انسامبل كازسيك اتىنداعى وركەستر بولىپ قايتا قۇرىلدى. سلەتكە قاتىسقان دومبىراشىلار ل.مۇحيتوۆ، ق.جانتىلەۋوۆ، و.قابيعوجين، ن.بوكەيحانوۆ، ع.ماتوۆ، قوبىزشى ج.قالامبايەۆ وركەستر قۇرامىنا الىندى. وركەستردىڭ باس ديريجەرى ءارى كوركەمدىك جەتەكشى بولىپ جۇبانوۆ تاعايىندالدى.